قطر خطر وأمريكا أخطر..!

إياد الإمارة ||

قال سياسي بصري عتيد: شفتوا شلون ما خليناه يصير محافظ؟
مُكرراً العبارة في مرحلتين!
فقلتُ له: وماذا يعني ذلك؟
قال: هذه هي السياسة!
فعدتُ وسألته: وأنت شحصلت؟
شنو ربحت؟
يعني السياسة بس تشاكس وتمنع هذا وتوگف بنص طريق ذك لو اكو بيها ربح إلك ولربعك؟
هو بوقته ما رد علي وأنا ما لحيت عليه بالسؤال، بس النتيجة هسة كلش واضحة عندي بأن الرجل إن غاب لا يُفتقد وإن حضر لا يُعد ..
يعني السياسة مو هيچ يا أفندي.

السياسة مو أن تتوقع بأنك تخدع أمريكا ..
أمريكا الإرهابية مو سهلة وهي قوة عظمى بالتآمر والتحايل والمكر والخديعة ..
مَن أوهمك بالضحك على أمريكا هو عميل أمريكي يُريد أن يوقعك بالفخ ..
سالفة تخدع أمريكا مُضحكة جداً ..
والسياسة مو تروح تتحالف وي الفارة وتترك الفيل صحيح الأثنين حيوانات “خليجية” بس حيوان عن حيوان يفرق ..
السياسة مو أن تشتغل بمبدأ فرق تسد بين الخوان وأولاد العم والخال وأبن أخته لأن خبصة الشليلة مو بصالحك، وبدلاً من أن تفرقهم من حولك وحدهم لتكون أقوى أمام تحديات كثيرة تواجهك في مسيرتك القصيرة.

من واحد يروح بطريق -بالسياسة- لا يروح زايد ..
بمعنى من يصادق خل يصادق على كيفه، ومن يعادي خل يعادي على كيفه، يعني بالحالتين لازم يخلي خط رجعة ..
وخل يؤمن بالرجعة بالمعنى العام والمعنى الخاص ..
بس لا يصير كل همه أن يرجع للمنصب دورتين ويخسر المشيتين ..

والدي رحمه الله مدرس لمادة الكيمياء توفاه الله عن عمر قصير كان مُثقفاً جداً، حكيماً، يستشرف المستقبل ببصيرة ثاقبة، وكان يقول طيب الله ثراه: الكذا كل شيء يصير بس آدمي ما يصير.
صحيح هسة وقت الكذا وكل شيء صاروا بس أوادم ما صاروا ابداً ولا راحوا يصيرون أبداً.

قطر أبداً مو خيار ..
أمريكا هم مو خيار ..
الخيار الحقيقي هنا بداخل العراق ..
الخيار الحقيقي أن هوانا وأُمنياتنا كلها مؤقتة، زائلة، لن تعيش طويلاً لأنها من عندنا وما عندنا سينفذ في يوم ما، لكن ما عند الله تبارك وتعالى هو الباقي، هذا قوله جل وعلا ..
والعاقبة للمتقين ..
ليست لمَن يعتقد أن السياسة هي الحيلة أو هي الغاية التي تُبرر الوسيلة أو هي أن تُكوّن نفسك لتصبح من أصحاب رؤوس الأموال المُهربة خارج العراق.
السياسية الحقيقية هي ما يُرضي الله الواحد الأحد ومن المؤكد إن ما يُرضي الله ينفع الناس جميعاً.

أرجع لصديقي السياسي البصراوي؟
أحچيلكم شجاي يسوي؟
لا ما راح أحچي ..
بس إلي يريد يعرف شجاي يسوي خل يرجع لأسطورة علي الصويح وي الجنية وشنو نهاية الجنية لأنها نفس نهاية صديقي السياسي البصراوي ..
وعلي الصويح العارفة هذاك هو كل شيء مابيه بس العافية عنده.